Púkk

Púkk er spilaleikur sem var alltaf spilaður í æsku minni á jólunum. Reglurnar eru eftirfarandi.

Spilarar geta verið frá 2 – 7. Hver og einn spilari þarf að velja sér mannspil frá ás til 10 og einn laufgosann sem er panfíllinn.

Notaður er venjulegur spilastokkur en það eru tekin úr lágspilin frá 5 – 2.  Ef fáir eru að spila má taka fleirri lágspil út svo spilin rekji sig betur en sexurnar eru notaðar.  Hjá sumum voru sjöin tekin úr stokknum líka. Í upphafi spils fá allir jafna upphæð spilapeninga til að spila úr og þegar spilin eru gefin þurfa allir að greiða einn spilapening í púkkið.

Gefin eru 5 spil á hendi eitt í einu og búnkanum hvolt og eitt spil látið velta, sá litur sem kemur upp er ráðandi. Þannig að ef spaði kemur upp, þá geta þeir sem hafa spaðaásinn á hendi sýnt spilið og rukka þann sem hefur valið sér að vera ás um einn spilapening og svo frv. Hafi einhver laufgosann þarf sá sem er panfílinn að borga sama hvaða litur er ríkjandi. Þess vegna fær sá sem er með laufgosann á hendi greitt frá tveimur ef laufið er ríkjandi. Sá sem er með tvö sex á hendi fær púkið eða sá sem er með panfílinn og eitt sex. Hafi tveir tvö sex eða sex og panfílinn, skiptist púkkið á milli þeirra. Enginn fær greitt nema að sýna spilið sem verið er að rukka fyrir.

Fyrstur lætur út sá sem er sólarhringsmegin við þann sem gefur og ræður hann hvaða spil hann lætur út af sinni hendi.  Ef hann t.d. lætur út hjartatíu, þá má sá næsti smeigja hjartaníu undir bunkann og svo má setja ofaná hjartatíuna hjartagosa o.s.frv. Þegar ásinn er kominn, þá má sá sem hann lætur út ráða hvaða spil er næst, eins ef stokkurinn stoppar einhverstaðar þá má sem á síðasta spilið láta út næst.

Alltaf má smegja undir eitt spil einu lægra spili, en það má ekki trekkja á þann hátt.  Sá sem trekkir (klárar spilin sín og vinnur spilið), fær greitt frá hinum eina kaffibaun, glerbrot eða hvaða spilapeningar sem eru í gangi fyrir hvert spil sem þeir hafa á hendi.

Þegar spilarar eru búnir með spilapeningana sína, geta þeir slegið lán hjá bankanum og haldið áfram að spila.

Leikurinn hættir þegar allir geta komið sér saman um að hætta, þó einn fari í fílu þarf leikurinn ekki að hætta. Ef sá sem er með kónginn fer í fílu getur sá sem er með tínuna fengið kónginn ef hann vill. Spilapeningar filumannsins gengur til bankans en oftast er sá sem er í fílu blankur og skuldum vafinn.

En fólk hefur reglurnar eftir sínu höfði, margir vilja ekki leyfa að smegja spili undir vegna þess að það getur valdið misklíð, eins var oft rifist um það hvort það mætti setja eitt spil ofaná eftir að það var búið að trekkja.

Góða skemmtun!

Ester Sveinbjarnardóttir

Athugasemdir

[Guðrún María Óskarsdóttir., 2.12.2007 kl. 02:51]

Já voru spilapeningar ekki eldspýtur ?

kv.gmaria.

[Guðrún Birna le Sage de Fontenay, 5.12.2007 kl. 04:44]

Það var nú alltaf spilað uppá ekta (gamla) peninga í Yzta-Bæli og heima hjá mér   Var voða ánægð með þennan væna varasjóð þegar ég var lítil - höfðum ekkert að óttast ef harðnaði í ári

[Ester Sveinbjarnardóttir, 5.12.2007 kl. 22:04]

Já það var visst öryggi í því að vita af kopar krónum í skápnum hjá pabba og afa þínum.